Рыма-Каталіцкія парафіі Святога Міхаіла Арханёла ў г. Навагрудку і Святога Казіміра ў аг. Уселюб запрашаюць прыняць удзел у каляднай дабрачыннай акцыі “Кошык Дабрыні”, якая праводзіцца ў Навагрудскім раёне ўжо чацвёрты год.

Акцыя праходзіць з 15 снежня 2020 года па 15 студзеня 2021 года ў Навагрудскім раёне.

Мэтай акцыі з’яўляецца аказанне дапамогі спажывецкімі таварамі (перш за ўсё харчовымі), канцтаварамі, дзіцячымі цацкамі, сродкамі асабістай гігіены і чысціні для дзяцей-сірот, дзяцей-інвалідаў, малазабяспечаных і шматдзетных сем’яў.

Пакупнікам, кліентам гандлёвых кропак прадстаўлена магчымасць ахвяраваць (падарыць) прадукты і іншыя тавары ў так званыя “кошыкі дабрыні”, якія будуць размешчаны пры выхадзе ля кас гандлёвых кропак.

У гэтым годзе акцыя бярэ накірунак на дапамогу дзецям-інвалідам з Цэнтра карэкцыйна-развівыючага навучання і рэабілітацыі ў г. Навагрудку і дзецям-інвалідам горада і раёна. Пасля завяршэння акцыі ўсе сабраныя тавары будуць накіраваныя на дапамогу патрабуючым не залежна ад іх веравызнання.

У калядны і навагодні час дабрачынныя акцыі праходзяць амаль што ва ўсіх краінах свету, незалежна ад іх матэрыяльнай забяспечаннасці і маюць на мэце не толькі аказанне дапамогі патрабуючым, але і абуджэнне ў людзях спачування, дабрыні, шчодрасці і чалавечнасці.

Упэўненыя, што такая акцыя пойдзе на карысць нашай малой радзімы – Навагрудчыны. Дослед паспяхова праведзеных папярэдніх акцый у мінулых 2017-2020 г.г. паказаў, што звычайныя людзі ставяцца неабыякава да патрэбаў сваіх бліжніх.

Сёлета запрашаем далучыцца да акцыі “Кошык Дабрыні” прадпрыемствы і індывідуальных прадпрымальнікаў Навагрудчыны.